- María José Moreno. Neuróloga. CHUVI
- Clara Domínguez. Neuróloga. CHUS
Denominamos tratamentos "modificadores da enfermidade" a aqueles capaces de frear a enfermidade ou mesmo revertela (ao contrario que os que temos actualmente, que só modifican os síntomas sen ir á orixe do problema). Na actualidade, non existen tratamentos modificadores da enfermidade aprobados en España para ningún tipo de demencia.
As investigacións máis próximas a transformarse en tratamentos accesibles para todos son as de inmunoterapias. Trátase de fármacos capaces de eliminar o amiloide do cerebro (o amiloide é a proteína daniña que se acumula no cerebro dos enfermos de Alzheimer).
O primeiro fármaco desta familia aprobado pola Axencia de Alimentos e Medicamentos de Estados Unidos (FDA) foi Aducanumab, pero baixo vixilancia para comprobar a súa eficacia no uso do día a día. Finalmente concluíuse que o seu uso comportaba máis riscos que beneficios e que a evidencia da súa efectividade era escasa, polo que o fármaco foi retirado. Nunca chegou a ser aprobado pola Axencia Europea do Medicamento.
Lecanemab é o segundo tratamento desta familia aprobado pola FDA en xaneiro de 2023 e pola Axencia Europea do Medicamento en novembro de 2024. A aprobación restrínxese a un grupo de pacientes moi específico. O seguinte paso é o é o envío por parte da EMA das súas recomendacións á Comisión Europea para a súa aprobación definitiva. Posteriormente, cada estado membro decidirá sobre o seu prezo e posible financiamento desde os seus respectivos sistemas de saúde. Hai que ter claro que este medicamento, aínda que sexa financiado polos sistemas nacionais de saúde, non estará dispoñible para todos os afectados pola Enfermidade de Alzheimer, só para un subgrupo moi concreto de pacientes, e en ningún caso supón unha cura. Os pacientes que o reciban, terán, no mellor dos casos, unha progresión dos síntomas máis lenta durante unha tempada, e non estarán exentos de sufrir efectos secundarios.
Finalmente Donanemab foi aprobado tamén pola FDA EN 2024 e está en proceso de revisión pola EMA. Se se chega a aprobar o seu uso en Europa e España, algúns pacientes poderán recibilo, pero igual que no caso de Lecanemab, só será útil en determinados casos de enfermidade de Alzheimer e en ningún caso supoñerá a curación da enfermidade.
