- Ester Suárez. Neuróloga. CHUF
- Clara Domínguez. Neuróloga. CHUS
A afasia progresiva primaria (APP) é unha enfermidade dexenerativa que produce un dano gradual naquelas zonas do cerebro que controlan a linguaxe e a fala. Existen tres subtipos principais: APP agramatical ou non fluente, APP semántica e APP logopénica. Cada un destes subtipos estará asociado a diferentes cambios patolóxicos e ten unhas características particulares.
É hereditaria?
Na maior parte dos casos non o son, e se non existen antecedentes familiares non é preciso realizar estudos xenéticos.
É o mesmo que a enfermidade de Alzheimer?
Non son a mesma enfermidade, aínda que as dúas son enfermidades dexenerativas que afectan o sistema nervioso central. Algúns subtipos de afasia progresiva primaria (a forma logopénica) asociáronse á patoloxía causante da Enfermidade de Alzheimer, con todo, a maior parte dos casos asócianse a outro tipo de patoloxía (dexeneración lobar frontotemporal) e os síntomas e a evolución son diferentes.
Como evoluciona? Cales son os síntomas típicos?
Ao principio, nas fases iniciais da enfermidade, os síntomas poden pasar desapercibidos. As persoas afectas poden experimentar dificultades para expresarse, para atopar os nomes dalgúns obxectos ou mesmo para entender conversacións. Os síntomas empezan e progresan de forma gradual e de forma diferente en cada tipo de afasia primaria. A memoria permanece relativamente intacta, especialmente durante os 2 primeiros anos e poden chegar a aparecer dificultades na lectura e a escritura a medida que a enfermidade progresa. É preciso saber recoñecer algúns dos seus síntomas para permitir a detección temperá da enfermidade por parte dun neurólogo.
Que tratamentos ten?
Neste momento non existe un tratamento curativo para esta enfermidade nin para as causas que lle subxacen, con todo, en moitos casos consíguese retardar a progresión con medidas non farmacolóxicas, como a logopedia e as terapias que ensinan recursos para compensar as funcións deterioradas. Nos casos nos que se sospeita que a patoloxía causante é Enfermidade de Alzheimer pódense usar os inhibidores da acetilcolinesterasa para reducir os síntomas durante un tempo.
É importante ter claro que a diferenza dos pacientes que sufriron un infarto ou unha lesión puntual no cerebro, os pacientes con APP non melloran co tempo. Con todo, as terapias non farmacolóxicas poden ser de axuda para maximizar as habilidades e capacidades de comunicación destas persoas.
